醒悟深造班 細胞溝通第二課 - 整日課堂後得出嚟嘅答案簡直意想不到

醒悟深造班 細胞溝通第二課

上完細胞溝通第一堂後，工作突然出現好多未知數嘅變動，預最壞打算係失業無錢，連帶網絡上近排不斷重複散播著災難、求生等訊息，令到我情緒爆發不安、驚慌、擔憂、焦慮，感恩第一堂同第二堂嘅時間相距短，個心唔洗辛苦好耐，唔洗捱好長時間。

終於上第二堂做靜心前，我認為我係擔憂失業無錢，繼而影響到我想做嘅嘢，但整日課堂後得出嚟嘅答案簡直意想不到。

係第一次靜心時我個心好痛，有嘢壓住呼吸唔到，同埋感覺到有條刺插住係個心深處，與內在沒有任何對話，當分享時黃先生提醒我要細分問題，問我內在究竟係因為錢問題？ 生死問題？ 還是生活問題？ 第二次靜心開始，我緊記要細分問題，內在出現小篆字體「生」字，我問係乜嘢意思？ 之後有意識同無意識上演寒戰入面郭富城與梁家輝激烈對話情境，內容好混亂完全聽唔清楚對話內容，但最入心個句說話係「你已經好幸福，你能夠做到自己想做嘅嘢，好多人都身不由己。」 即係我根本唔係擔心失業無錢，我個心又開始感受到刺痛，於是我利用以前跟其他老師學過嘅嘢，將刺痛形象化，再觀想去清除投入返靜心過程，我內在即刻出聲話「你都未解決個問題。」 嗯。。。我意識即刻閃出一件係半年前發生關於一位長輩同錢銀嘅事，呢件事令我個心耿耿於懷，覺得好受委屈，好冤枉，係呢件事我自己平伏咗好耐，自己有諗過我係咪需要對方嘅一句道歉？ 但又覺得唔係，未係我想要嘅答案，我再次係靜心過程細分問題，我感受到唔信任，內在終於再次開聲「係事件上你根本無做過任何壞事，點解你要將對方嘅情緒、感受加比自己承受去傷害自己，你完全唔信任、唔相信自己，點解要跌入人哋做出嚟嘅漩渦入面。」 身體即刻感受到細胞們卜卜跳動。 再進入靜心，我看到有個舞台轉變成一粒發光星星，呢個舞台就係人哋嘅漩渦，我跌咗入去成為其中一個演員，我終於認清背後嘅真相，我內在話「呢個已經係舊模式，我已突破，寬恕放下咗呢件事。」 細胞們再次卜卜跳動。當分享完，黃先生協助解釋細胞跳動係因為我已確實突破咗，細胞們覺得「好震驚」而卜卜咁跳，我嘅內在真係同我外在一樣，唔會講太多說話，真係要講嘅就會一針見血，點都估唔到我內在會推翻我所學過嘅嘢，要我重新學習最直接、最簡單、最快、最落地嘅新知識，同埋要開腦學習去思考、去細分問題。曾幾何時，我真係覺得自己有啲蠢，點都解讀唔到靜心時嘅訊息，黃先生亦同我講過我要學識解讀，到今日我終於明白我真係無思考過同真係無用心與內在細胞連繫，感恩我仲有一口氣去呼吸，感恩認識到黃先生講細胞連繫嘅課，感恩各位老師們，大家嘅分享都解答咗好多我需要嘅嘢。

另外一個小分享，尋晚我想確認多次係咪真係連接到內在訊息（又係唔信任自己嘅問題），因為我要記實真係連繫咗內在個種感覺，所以做咗個小實驗去分別震動位置，有意識對話位置（感受到能量震動係個頭），無意識對話位置（感受到能量震動係個心），開始連繫內在即被mean爆，我嘅內在即講「我就係我，無需要任何證明。」哈哈！明白晒，真係好有我嘅風格，mean底人。

Snow Ng

2025.04