我與黑白從此融合，取回人生主導權 ─ 由被動變為主動，共同合力完成今世課題

尋日搵黃先生做第二次諮詢，點都估唔到係由一個Logo名而引起我嘅本源（阿白）幫忙Calling黃先生解決。

Peaceful Soul Space 睇落好普通嘅名字，點都估唔到呢三個英文生字串連一起係會吸引到唔同維度嘅能量體，而引發一連串嘅事情，簡單講講我嘅本源本來係三個互相合作互相連繫嘅個體，佢哋分為阿白（保護我）、阿黑（攻擊我）兩個面向加埋我呢塊（夾心餅），而累世所有發生嘅事都係我哋三個幻化不同角色好刁鑽咁去演變出嚟。

入正題，9月尾我搵朋友幫我設計Logo圖，因為我想出一系列嘅產品，整個設計連溝通過程約10月中後期就定好晒，諗住比錢個一刻被黃先生剎停要我馬上改名（加急個隻），諮詢後就知道整件事真係鋪排得剛剛好。

係設計梗圖嘅呢段時間入面，我需要去一趟大酒店參加告別式，原先我意願係唔想去，亦唔敢去，知道自己係好易瀨嘢體質，避得就避，但我又想好有心出席安慰下亡者親屬，我內心就開始產生矛盾，然後我就同自己對話決左去定唔去，點都估唔到阿黑佢迷惑我，佢幻化阿白，叫我跟隨內心去參加告別式，真係比佢引誘到我去大酒店，抵達大酒店我已不斷諗卡平伏我嘅不安，仲打醒十二分精神唔敢周圍望，拜祭後我係大酒店大堂等朋友換衫一同離開，係等待呢十分鐘嘅時間入面，我就為阿黑好似派傳單咁招攬生意，招咗好多唔同嘅低頻能量。

到了第二朝，我被惡夢驚醒，個心跳得勁快，雙耳可以聽到卜卜卜嘅心跳聲，需要不停諗卡平伏落嚟，心知係大酒店瀨咗嘢，之後差不多每晚都發惡夢，夢到好多唔同種類嘅人，出現嘅大多數都係我驚個某幾種人，夢入面佢哋需要我去協助處理問題，攪到我呢段時間唔係太敢瞓覺，因為我怕發夢再見到好多我怕嘅人或物，同埋我嘅精神越嚟越差。

去完大酒店後，我內心好想搵黃先生傾傾，無奈我無動力發訊息比Jessica，拖拖下就過咗一個星期，我與家人去咗離島露營車玩，當晚一瞓著就即刻感覺到不斷比嘢咬醒，感覺到雙腳嘅神經跳動，重複咗好多次，仲有一刻感覺到有個低頻人形由天花壓落我個身度，攪到我又再唔敢瞓，當晚我只能夠眼光光不斷諗卡，唉！我又再瀨嘢！

直到比錢設計師前一日，收到一個唔係好熟嘅朋友講咗一條關於靈氣嘅訊息，因為我唔識靈氣，所以我就問吓其他朋友，Jessice係我問嘅其中一位，傾談中佢突然話快閃與黃先生食晚飯，我當晚真係free time，呢個快閃對我嚟講真係來得剛剛好，

當晚與黃先生見面後，我講咗以上嘅經歷，最恐怖係黃先生透過我隻手鈪睇到我最近身邊出現一個球體形狀、見到有個小孩指示著一個方向、見到有對手扯住我隻腳嘅影像(對應咗露營車不停有嘢咬我雙腳)，

我即時睜大眼答黃先生：我最近做咗個Logo就係球形，

黃先生一睇個Logo，嘩一聲後，要我即時改Logo名，然後開始簡單咁講解呢個名與以上發生嘅事，就係因為我呢個咁刁鑽嘅體質，配上Peaceful Soul Space，就成為咗招攬(低頻)客嘅經紀，Peaceful 係我本源嘅能量源頭，當我去咗啲充滿低頻能量嘅地方，而Soul就係迷失嘅亡靈，Logo名仲要有埋個Space，咁就啱晒低頻們依附我去協助帶佢哋回歸屬於佢哋嘅維度，

我聽完黃先生咁講解，我真係啞口無言唔知比咩反應，然後好無奈回應：我點都唔會諗到一個咁普通嘅名係可以用嚟招肉眼睇唔到，而又存在係不同維度嘅客，我嘅初心唔係幫呢班低頻能量，我係從自然環保方向發展的。

待續。。。（太長喇！仲寫梗整個諮詢過程😆）

---------

第二章開始喇！

快閃晚飯時，我留意到自己多咗個口頭禪，會不斷講（好驚），連黃先生都留意到就知（好驚）呢兩個字能量有幾勁同講得幾咁密，

呢斷期間，我個人經常斷片，完全諗唔到嘢，仲要我去諗個新Logo名，真係難上加難，我諗咗幾日諗爆頭都諗唔到，於是我搵咗Apple幫我諗幾個名，揀咗個心水名後，諗住星期五聚會時同黃先生傾下，仲以為自己捱得到星期五，發現自己斷片情況越嚟越嚴重，我可以係商場遊蕩都諗唔到自己要去邊，個腦只有模糊印象係要買嘢，但又諗唔起要買乜嘢，我嘅精神真係越嚟越唔集中，

晚上仍然會發好多人群嘅夢，雖然唔係惡夢，但都消耗梗自己嘅能量，加上我嘅工作係對好多數字，精神一唔集中出錯就真係大檸樂喇！

直到上星期日，我精神狀態真係頂唔順，成日有種自己會突然暴斃嘅感覺，所以忍唔住要係星期五前約黃先生見面，

都要感謝黃先生係百忙之中抽到少少時間與我見面，黃先生一見到我發現我嘅精神狀態比快閃晚餐個晚再差啲，面色越嚟越蒼白，於是黃先生幫我做咗個初步諮詢，再提議幾個方案等我自己決定，只要自己忍受到精神唔集中，接受到斷片，日常生活係唔會有影響，

但對於我嘅工作同我想做一個品牌嚟講，對我影響就真係好大，初步諮詢後我都決定翌日做詳細諮詢，我覺得係有限嘅金錢裡解決到深遠嘅問題就唔係問題，仲可能會有意想不到嘅收穫。

翌日朝瞓醒竟然無發夢，心情輕鬆咗唔少，好彩我預咗好多時間比自己提早出門，出門前梳洗照鏡驚見自己個樣變咗另一個人，尤其係對眼變得好陌生，心情即由天堂跌落地獄又折返人間，而諮詢時間越來越接近，我個心情就越嚟越煩燥，想去餐廳食個早餐，間餐廳有好多位，我行為上要指定揀某張4人枱坐，職員唔比，我即刻嬲豬，走人唔食，明知食個早餐唔會用好多時間，坐邊都無所謂，

我就係被煩燥嘅情緒控制咗行為，結果左兜右兜兜咗成個鐘至可以食到個早餐。

諮詢時候到了，一開始我表現得好呆、好懵、好遲鈍，完全入唔到狀態，只出現一啲零碎、模糊同我驚嘅影像，再加上黃先生話我左眼變梗，變咗斜視，

於是黃先生改一改個方式，比我靜心讓我抽離一陣，慢慢開始進入狀態，阿黑幻化咗多我害怕嘅昆蟲或物種嚇我，還出現了一啲靈體迫係我面前，

阿黑真係好狡猾，仲未肯現真身比我見，攪咗個幾兩個鐘，阿黑呢個大佬漸漸出現喇！於是黃先生問我想唔想請唔同維度嘅阿黑同我對話，真係好癡線，但又覺得好有挑戰性，我話好，我想體驗一下，初時我未知阿黑嘅真正身份，一開始對話時，阿黑已經失控咁喊（我感覺到我個樣好似食咗酸梅乾咁揦埋一舊），於是我叫佢冷靜一下先，如果佢唔冷靜我係問唔到佢係邊個，

一會兒後，阿黑就能量大爆發，我真係估唔到阿黑嘅怨氣大得驚人，佢好似個原子彈咁，一爆我成個人毛管戙，越嚟越暈，個口係咁震，仲好想嘔，又出唔到聲，我開始想暈低之際，我要靠自我意識去控制清醒一下，向黃先生講頂唔順要暫停休息下，我驚我真係突然瓜咗，阿黑嘅能量大到我呢世都唔會忘記，仲有黃先生真係好勁，呢個體驗真係好震撼。

休息咗一陣，黃先生即刻要我圍醒悟卡，我第一次諮詢都唔洗圍，即係今次嘅能量真係好勁。

對話再開始：

我：「你係邊個？」

阿黑：「我吖！係我吖！」

我：「我唔信，你唔係我！你係邊個？」

阿黑：「我囉！係我吖！」（詭異嘅環迴立體笑聲）

我：「唔係我吖！你唔好講大話！你究竟係邊個？」

阿黑：「係我吖！你殺咗我架！」

（黃先生指示我去問阿黑我點樣殺佢。）

我：「我點樣殺你？」

阿黑：「你斬我條頸同割我喉。」（我後頸同右頸側開始痛）

（黃先生就記得我第一次諮詢時，曾經係某一世斬過阿黑條頸，而我就記得個一世我係飾演一個男人，咁就清晰咗佢係阿黑。黃先生再指示我問阿黑，佢當時係乜嘢身份？我當時係用乜嘢殺佢？同做乜事殺佢？）

我：「你當時係乜嘢身份？」

阿黑：「我只係個平民。」（感覺佢係個女人）

我：「我當時係用乜嘢殺你？」

阿黑：「你拎住支長槍，你用槍柄打我，你打斷咗我條頸。」（出咗個斷咗頸、個頭側埋右邊、笑容好詭異嘅女人影像）

我：「我做乜事殺你？」

阿黑：「你嚟搶嘢，之後就打我，我跪咗係你面前，雙手合十求你唔好打我。」（見到阿黑跪地同合十影像）

（黃先生指示我問阿黑想要乜嘢？我要點做？同埋如果我唔做會點？）

我：「你想要乜嘢？」

阿黑：「我要愛、關懷。」

我：「我要點做？」

阿黑：「你所有事都要預埋我、要比我知、唔準攪小圈子，我唔要被孤立。」

我：「如果我唔做會點？」

阿黑：「你會一直都痛，同埋會再次重複所有事。」（我做過手術嘅位置開始痛。）

（黃先生指示我問阿黑點解要令到我痛？）

我：「點解要令到我痛？」

阿黑：「我要你知道我嘅存在！但我預計唔到個後果。」（我21年入院做手術取出良性腫瘤）

我額外問：「咁身體疼痛會唔會消失？」

阿黑：「跟你一世，我要你記住我嘅存在！」（語帶有恐嚇成份）

了解到阿黑背後嘅原因後，唉！原來阿黑佢一直缺乏愛與關懷，佢處於迷失嘅位置，佢被孤立，所以一直靠嚇我嚟引我嘅關注，哈哈！

我可以同大家講我嚇大架，了解背後原因後就開始聽阿黑想我用乜嘢落地方式為衪治療，就係我要與衪們（黑與白）合一，由被動變為主動及取回主導權，一起合作係地球取得生命與生存的經驗值。

故事未完，待續。。。（今次真係好長。。。長。。。長。。。）

---------

到第三章圓滿嚕！

在自我對話過程中，深入了解到阿黑有乜嘢性格，也可以了解到我邊一方面代表阿黑，當阿黑擁有愛，被關懷時，佢就會呈現出調皮，活潑，樂觀，好多嘢講嘅特質，但當阿黑失去愛及關懷後，佢就會變得跳制，帶攻擊性去傷害自己，阿黑亦會再次幻化妖魔鬼怪來嚇我，亦代表我與衪們再次失去連繫。

開始著手幫阿黑輕觸自己身體做治療，阿黑會發出輕微嘅疼痛指引我送愛到身體邊一個部位，每個部位接受愛嘅時間都唔一樣，最微妙嘅係輕觸後，疼痛位置唔會痛，但就會周圍轉移，阿黑真係好調皮，佢要我記住佢嘅存在，

到最後治療完成後，黃先生了解埋我想出嘅產品方向便幫我整合，聽完後我真係好感動，

原來我嘅本源已經為我提供咗Logo新名字，叫做「森源自然」，英文名就用我自己本身的名字，這就是代表我，「森」就是我與黑白們三為一體，互相平衡大家，「源」就是我們仨嘅源頭，而自然就是我一直想推出嘅產品係關於環保、素食、淨化、照顧到內外健康嘅食品、還有選擇不經動物測驗嘅產品，這都是屬於自然嘅方向，

原來8年前我選擇咗素食係對的，而家寫返出嚟都感動到想流返滴眼淚，諮詢完畢阿黑仲未釋放完佢嘅怒氣，我即刻肚痛要排毒，而阿黑嘅能量勁到可以令我手機寫分享嘅備忘錄不斷彈app，睡前我仍想繼續寫，個app就不停彈，我投降了！都係要抽多啲時間與阿黑連繫，阿黑先是幻化一隻好可愛嘅樹懶，我送上愛後，阿黑就變成一個帶著笑容嘅女孩影像慢慢消失。

到今朝瞓醒，夢入面出現一套舊韓戲入面嘅其中一首歌，套韓劇叫《欲戴王冠，必承其重－繼承者們》，首歌係2am 嘅 Moment ，睇完首歌嘅MV後，我醒起因為呢套韓劇，我喜歡劇入面嘅捕夢網，所以我買咗個一模一樣放係床頭，而黃先生曾經同我講過，我床頭有股好大嘅負能量，形容過似蜘蛛咁嘅物體，我一睇就知道係捕夢網，

原來阿黑一直都比好多Single 我，只係我一直無覺察，現在終於圓滿了，最後阿黑還送上這首歌給我，我睇完歌詞後，就係好吻合我們共話時嘅內容與感受，哎呀！我又再感動到流多兩滴眼淚，阿黑同阿白，沙冷hea 🫶🏻！神奇地我手機備忘錄今日無再彈app。

特別感謝黃先生嘅協助，期待黃先生將醒悟發揚光大，幫助到更多有需要嘅人🥰。

諮詢後閒談：我問黃先生點解我要做第二次諮詢，黃先生仍好細心講解，我個本源比較刁鑽，加埋我有三個能量體集於一身，第一次係釐清我與阿黑同阿白嘅關係，第二次嘅諮詢，終於清楚知道我係今世搶到C位做人，要由被動變為主動，共同合力完成今世嘅課題，若有課題未完成，如果有下世嘅話，我可能會成為阿黑或阿白。

亦因為咁阿黑同阿白無時無刻都比好多指引我。見黃先生前一日出咗奧修呢張「整合」嘅牌，再回想返，阿白亦比過好多msg提醒我，例如「紫寧」呢個靈性名嘅出現係直接calling我，就係因為我一直被干擾，完全接收唔到，而演變出以上嘅所有事，

現在我可以放下這個靈性名字，用回本名「雪」，❄都係來自自然，純白色 = 阿白🥰。

Charing

2023年11月